نام: (عربی) اِذخَر۔ (فارسی) کاہ مکی،گورگیاہ۔ (ہندی) گندھیل،روسا گھاس۔ (سنسکرت)روہش۔ (اردو) جرانکس۔ (پنجابی) کھوی گھاس۔ (سندھی) سسٔی جو پتھر۔ (مرہٹی)  سوگندھ۔(گجراتی) روش۔ (بنگالی) روشیل۔

 (انگریزی) Lemon Grass  لیمن گراس

اس کے پتوں کو ہاتھ میں ملنے سے ایک خاص قسم کی خوشبو آتی ہے۔ اس کا شگوفہ اور جڑ بطور دواء مستعمل ہیں۔ اس کی جڑ اور پھولوں میں سے لطیف اور تیز خوشبو آتی ہے۔ ہندوستان میں جو اذخر ہوتاہے اس کو گندھیل  کہتے ہیں۔ حجازی اذخر اچھا ہوتا ہے اس کو اذخر مکی کہتے ہیں

مقامِ پیدائش: سنٹرل انڈیا،راجپوتانہ(ہندوستان)،عربستان،بہاولپور(پاکستان)، ٹراونکور۔ کوچین۔

: افعال واستعمال

 منضج اخلاط غلیظہ،مفتح سدد (سددے کھولنے والی)،محلل اورام (ورموں کو تحلیل کرنے والی)،کاسر ریاح،دافع تشنج،مدر بول و حیض،مقوی معدہ(معدہ کو طاقت اور قوت دینے والی) وقابض(سکیڑنے والی، بند کرنے والی)۔ اذخر کوسردبلغمی امراض مثلاً فالج،لقوہ،تشنج،استرخاء،نسیان اور تپ بلغمی میں بطورمعدل اور منضج کے دیتے ہیں۔ شگوفہ اذخر تمام افعال میں زیادہ قوی ہے۔ موسمی بخاروں اور بلغمی امراض میں اس کا جوشاندہ کثیرالنفع ہے اس کو چائے کی طرح پانی میں دھیمی آنچ پر دودھ ملا کرگرم گرم پینا زکام،نزلہ اور انفلوئنزامیں نافع ہے۔ اس کے عرق میں قلعی کا کیا ہوا کشتہ دمہ اور کھانسی کیلئے اکسیر ہے۔ روغن اذخرکوانگریزی میں لیمن گراس آئل کہتے ہیں اور اس کاتجارتی نام روسا آئل ہے۔ یہ روغن پرفیومری اور صابن سازی میںمستعمل ہے۔ دواء ً بطورکاسرریاح،دافع تشنج،نفخ،قولنج اور ہیضہ میں بھی مقبول ہے۔ ایک حصہ روغن کنجد،دوحصہ میں ملاکردردکمر،وجع المفاصل اور چوٹ کے درد کیلئے مالش کرتے ہیں۔ (غیر سمی)

ذائقہ: تلخ اور تیز      رنگ: سبزخوش رنگ       بو: خوشبودار    مزاج: گرم خشک درجہ دوم        مقدارخوراک: 5گرام سے7گرام